Helen Mary a Myfanwy yn taro nôl ar yr ymgynghoriad ffug ar gynlluniau’r cyngor i’r henoed yn Llanelli

Yn dilyn cyfarfod gorlawn neithiwr yng nghartref preswyl Caemaen, gwnaeth Helen Mary Jones AC ac ymgeisydd seneddol y Blaid yn Llanelli Myfanwy Davies, gondemnio'r modd y gweithredwyd yr ymgynghoriad gan swyddogion, ac yn mynnu bod Pat Jones, y Swyddog Gweithredol yn gyfrifol am Ofal Cymdeithasol ,yn cymryd y cyfrifoldeb am ei phenderfyniad, a hefyd am y modd y gweithredwyd yr ymgynghoriad.

Yr wythnos diwethaf fe wnaeth y Llanelli Star adrodd yr hanes am gynlluniau’r Cyngor i gau cartrefi preswyl Caemaen a St Pauls’ yn Llanelli. Mewn ymateb i’r newyddion yma gwnaeth Myfanwy a Helen Mary chwilio am ,a derbyn sicrwydd gan Bruce McLearnon, Cyfarwyddwr Gwasanaethau Cymdeithasol Sir Gaerfyrddin , a honnodd mewn llythyr, bod yr holl opsiynau yn agored , ac nad oedd unrhyw benderfyniad wedi’i wneud hyd yn hyn i gau’r cartrefi.

Fodd bynnag, neithiwr, fe gadarnhaodd Bruce McLearnon gyda chefnogaeth Sheila Porter, Cyfarwyddwr Gwasanaethau Integredig taw ‘r cynllun yr oedd yn ei ffafrio oedd cau Caemaen a datblygu gwasanaethau cefnogaeth yn y cartref , sef ‘gofal ychwanegol’.

Drwy’r cyfarfod fe wnaeth y Cyfarwyddwr bwysleisio'r angen i dorri ar wariant fel y prif reswm am y cynllun. Roedd y trigolion a theuluoedd yn y cyfarfod llawn yma yn gwrthwynebu’r cau yn arw a gyda phleidlais llaw unfrydol roeddynt o blaid aros yng Nghaemaen.

Dywedodd Helen Mary Jones :

“Cefais i a Myfanwy sicrwydd bod yr holl opsiynau yn agored. Mae’n amlwg nad yw hyn yn wir yn ôl Cyngor Sir Gaerfyrddin ac mae hefyd yn glir bod y penderfyniadau yma yn cael eu gwneud am resymau ariannol. Oes, mae llai o arian ar gael, ac mae angen i’r ASau hynny a bleidleisiodd i achub y banciau edrych yn ofalus ar eu cydwybod yn awr, ond mae cyngor Caerfyrddin yn darganfod digon o arian i'w prosiectau arbennig ac i’w cyhoeddusrwydd ei hunain."

“Mae yn annerbyniol bod swyddogion y Cyngor yn camarwain teuluoedd drwy awgrymu bod Caemaen yn torri safonau gofal am nad oes cyfleusterau en-suite yno. Nid yw hynny’n wir. Yn ystod y cyfarfod roedd y swyddogion yn ceisio awgrymu bod eu cynlluniau yn amddiffyn urddas yr henoed. Fe wnaeth y preswylwyr a oedd yn bresennol ddangos yn glir ac yn unfrydol drwy godi llaw .Faint yw pris ei hurddas os anwybyddir eu dymuniadau?"

Ychwanegodd Myfanwy:

“Wedi derbyn sicrwydd gan Mr McLearnon, fe aeth Helen Mary a finnau i’r cyfarfod gyda meddwl agored. Ond mae’n amlwg bod Cyngor Sir Gaerfyrddin wedi hen benderfynu. Yn wir, pan ofynnwyd i’r Cyfarwyddwr gan y teuluoedd a’r preswylwyr, os oedd eu gwrthwynebiad nhw wedi gwneud unrhyw wahaniaeth i’w safbwynt, atebodd nad oedd. Mae hyn yn ei hun yn dystiolaeth arswydus bod yn rhaid i Gynghorydd Llafur Porth Tywyn gymryd y cyfrifoldeb gwleidyddol am ei phenderfyniad a gweithredoedd ei swyddogion.”

“Yn gyffredinol byddwn yn cefnogi cynlluniau sy’n cadw pobl yn eu cartrefi ac yn annibynnol ,gyda’r gefnogaeth briodol. Ond yn anffodus, nifer fach o enghreifftiau sydd yn dangos bod hyn yn gweithio. Yn y cyfarfod neithiwr, fe glywon fel roedd rhai o breswylwyr Caemaen wedi methu ag aros yn eu cartrefi gyda’r gefnogaeth gofal fel y mae , ac mewn rhai achosion roedd rhai wedi dioddef esgeulustod difrifol o fewn y gofal yn y cartref. Nid yw’n dderbyniol bod rhaid symud hen bobl yn erbyn eu hewyllys ”.

Mae Myfanwy a Helen Mary wedi addo i gefnogi grwp ymgyrchu bydd yn ymladd y cynlluniau yma i gau’r cartrefi.

Elfyn Llwyd AS i gwrdd â Swyddogion y Llynges Brydeinig yn Llanelli i drafod cymorth i bobl sy’n gwasanaethu

Mae Dr. Myfanwy Davies, ymgeisydd seneddol y Blaid ar gyfer Llanelli, wedi gwahodd Elfyn Llwyd AS Meirionnydd Nant Conwy ac arweinydd y Blaid Seneddol i gwrdd â chynrychiolwyr y Llynges Brydeinig Frenhinol yn Llanelli ddydd Gwener 6 Mawrth.

Cynhelir y cyfarfod am 2pm yn ystafell 4 yn Neuadd y Dref. Disgwylir y bydd Aerona Stupe, cyfarwyddwr rhanbarthol y Llynges Brydeinig Frenhinol, yn bresennol, ynghyd â chadeirydd a swyddogion cangen Llanelli.

Yn ddiweddar, mae Mr. Llwyd wedi codi pryderon ynghylch y cymorth a roddir i bobl sy’n gwasanaethu, ac ar ôl iddynt adael y lluoedd arfog.

Yn dilyn nifer o achosion o ddedfrydu cyn-aelodau’r lluoedd arfog am droseddau yng Nghymru, ceisiodd Mr. Llwyd gael ffigurau ar nifer cyn-aelodau’r lluoedd arfog yn y carchar, ac ni chafodd ateb boddhaol. Yna bu mewn cysylltiad â’r Gymdeithas Genedlaethol Swyddogion Prawf (NAPO) i gynnal arolwg o’i haelodau. Mae tystiolaeth yr arolwg yn awgrymu bod miloedd o gyn aelodau’r lluoedd arfog a fu’n gwasanaethau yn y Gwlff neu yn Afghanistan wedi cael eu dedfrydu i garchar am droseddau ar ôl eu rhyddhau o’r fyddin*. Mae’r canfyddiadau wedi achosi pryder gwirioneddol gan eu bod yn awgrymu bod hyd at 8,500 o gyn filwyr yn y ddalfa yn y DU, sef bron 10% o holl garcharwyr Cymru, Lloegr, yr Alban a Gogledd Iwerddon, gyda mwy na 7000 ohonynt yn y ddalfa yng Nghymru a Lloegr. Mae cefndir yr achosion yn dangos i fwyafrif y cyn-filwyr ddioddef anhwylder straen ôl-drawmatig (PTSD) ar ryw bwynt ac mai prin yw’r rhai oedd wedi derbyn unrhyw gwnsela neu gymorth ar ôl eu rhyddhau o’r fyddin.

Mae Elfyn Llwyd, sydd wedi ymgyrchu yn y gorffennol ar Syndrom Rhyfel y Gwlff, wedi llwyddo i gael trafodaeth ar gymorth i bobl sy’n gwasanethu wrth iddynt wasanaethu ac ar ôl hynny. Yn sgil y drafodaeth yn Neuadd San Steffan ar 21 Hydref 2008, cafodd mwy o seicolegwyr eu hanfon i Afghanistan ac Irac, ac mae’r Llywodraeth yn edrych ar ffyrdd o ofalu am aelodau’r lluoedd arfog ar ôl iddynt ddychwelyd adref.

Meddai Mr Llwyd:

"Ar ôl gweld nifer o achosion lle’r oedd aelodau’r lluoedd arfog yn troseddu er mwyn ceisio cael help, cyflwynais gwestiwn seneddol a gafodd ateb gweddol di-ddim. Doeddwn i ddim yn hapus â hynny gan fy mod wedi gweld cyn aelodau’r lluoedd arfog yn cael eu dedfrydu’n bryderus o reolaidd yn y llysoedd yn y Gogledd am ymosodiadau difrifol.

”Does dim esgus os mai diffyg adnoddau sydd ar fai. Ar adeg pan mae milwyr sy’n gwasanaethu’n gorfod ymladd ag offer annigonol, bydd methu mynd i’r afael â’r broblem hon yn fwy o dystiolaeth bod y Llywodraeth wedi torri’i haddewid i’r lluoedd arfog yn y ffordd fwyaf difrifol.”

Yn siarad o’i swyddfa yn Llanelli ddydd Mawrth, meddai Myfanwy Davies:

“Mae’n destun pryder mawr, ar adeg pan mae’r lluoedd arfod yn recriwtio o’n cymunedau, nad ydynt yn cael y gefnogaeth fwyaf sylfaenol sydd ei hangen ar y dynion a’r menywod sy’n ymgymryd â’r gwaith anodd a pheryglus hwn. Pe bai’r driniaeth gywir ar gael i’r aelodau hyn o’r lluoedd arfog sy’n dioddef, rwy’n argyhoeddedig na fyddai cannoedd os nad miloedd ohonynt wedi torri’r gyfraith. Mae’r llywodraeth yn eu gadael nhw a’u teuluoedd i lawr yn ddifrifol.

“Mae gwaith Elfyn i fynd i’r afael â’r mater hwn a chael mwy o gefnogaeth seicolegol wedi denu clod gan bawb, ac rwy’n falch iawn ei fod yn dod i Lanelli i gwrdd â chynrychiolwyr y Llynges Brydeinig.”