Dafydd Wigley: Gall Myfanwy adennill miliynau coll Llanelli

‘Roedd Llywydd Anrhydeddus Plaid, Dafydd Wigley, yn Llanelli ddoe i drefnu sut y byddai ethol Dr. Myfanwy Davies yn AS y dref yn rhoi’r siawns i gymunedau Llanelli ennill y miliynau y mae ar Lywodraeth Llundain iddynt.

Mae Plaid wedi bod yn ymgyrchu am flynyddoedd dros gynhaliaeth deg i Gymru o San Steffan. Yn ystod y ddwy flynedd ddiwethaf mae dau ymchwiliad annibynnol wedi dod i’r casgliad bod Cymru’n derbyn llawer iawn rhy ychydig o arian. Dros10 mlynedd dylai cymunedau Llanelli fod £240 miliwn yn gyfoethocach.

Gyda’r rhan fwyaf o bolau piniwn nawr yn rhagweld Senedd grog, a disgwylir i’r Blaid a Phlaid Genedlaethol yr Alban ennill y nifer fwyaf erioed o seddau, byddai’r grŵp mewn sefyllfa allweddol i gael chwarae teg i Lanelli.

Cyfarfu Mr Wigley gynghorwyr lleol ac arweinyddion y gymuned ym mwyty La Caprice a bu’n siarad â masnachwyr ym Marchnad Llanelli ynglŷn â ffyrdd o dynnu pobl i ganol y dref.
Dywedodd Mr Wigley:
“Gyda’r polau piniwn i gyd yn argoeli y bydd senedd grog, mae’r etholiad hwn yn dwyn atgofion i fi. ‘Roeddwn lawer iau a llai hirben na Myfanwy y tro diwethaf i ni gael senedd grog ac yr oeddwn yn aelod o dîm trafod y Blaid”.
“Y pryd hynny, ‘roeddem ni wedi ennill iawndal oddi wrth y Llywodraeth i’r glowyr hynny oedd yn anabl fel canlyniad i’r llwch ar eu hysgyfaint”.
“Y tro hwn, gyda grŵp llawer mwy a gyda thrafodwyr pen caled, profiadol fel Myfanwy, byddwn yn gofyn am ariannu teg i Gymru fel tâl am ein cefnogaeth i’r Llywodraeth nesaf ar faterion fel y gyllideb”.
“Mae’n hen bryd bod Llanelli’n cael chwarae teg o Lundain ac yn hen bryd danfon AS i Lundain a fydd yn rhoi anghenion Llanelli yn gyntaf”.


Ychwanegodd Myfanwy:

“Ar yr union ddiwrnod y mae’r Blaid Lafur, er mwyn rhoi hwb i’w cyflwr egwan, wedi dod â Tony Blair yn ôl, a hwnnw’r mwyaf ei anfri o wleidyddion Prydain, mae wedi bod yn bleser mawr iawn i fi groesawu Dafydd Wigley i Lanelli”.
Os gall unrhyw un ddangos sut y gall cymunedau Cymru elwa o gael AS Plaid, Dafydd yw hwnnw”.

“Nawr ein bod yn edrych ymlaen at senedd grog, ‘rwyf am fedru brwydro i gael y gynhaliaeth sydd ei hangen ar Lanelli, y gynhaliaeth a wrthodwyd i ni am gynifer o flynyddoedd”.

"Pa beth bynnag a fyddant yn ei ddweud mor agos â hyn at etholiad, mae’r ddwy brif blaid yn cynllunio toriadau. Trwy gael ariannu teg yn unig, medrem amddiffyn ein hysgolion, ysbytai a chartrefi gofal a chynorthwyo twf ein heconomi leol”.

Na i'r toriadau i'n hysgolion a'n hysbytai medd Myfanwy, Helen Mary ac arweinwyr cynghorwyr y Blaid

Mae Dr Myfanwy Davies, ymgeisydd San Steffan y Blaid yn Llanelli wedi datgelu fod ymchwil annibynnol Holtham yn dangos y bydd llywodraeth Llundain yn torri £227m sydd ei angen arnom yn Llanelli dros y 10 mlynedd nesaf.

Dywed Myfanwy:

"Roeddwn o hyd o'r farn fod trefn ariannu Cymru yn annheg. Ond mae ymchwil syfrdannol i ffigyrau llywodraeth Llundain ei hun yn dangos y byddwn yn colli
dros £220 miliwn dros y ddeng mlynedd nesaf - arian cwbl hanfodol i'n cymunedau yn Llanelli."

Fe gawsom lond bola o'r Blaid Lafur yn torri arian Cymru er mwyn taflu arian bonws at fancwyr Dinas Llundain. A bydd y toriadau yma yn ddwfn er fod ein llywodraeth ni yng Nghaerdydd yn gwenud eu gorau. Ni all Caerdydd fforddio defnyddio eu harian wrth gefn dro ar ol tro. Felly flwyddyn nesaf bydd y toriadau yn waeth byth.

Digon yw digon meddwn ni! Nid ein gwaith ni ydy tywallt arian i goffrau ffrindiau cefnog Peter Mandleson. Cadwch eich dwylo brwnt oddiar arian ein ysbytai a'n hysgolion. "

Ychwanegodd,

" Daw'r toriadau yma er i gomisiwn annibynnol Holtham ddweud na ddylid cyffwrdd ag ariannu Cymru hyd nes y byddwn yn cael yr cyllid sydd angen arnom i gynnal gwasanaethau cyhoeddus hanfodol. Ond mae Cymru yn cael llai o Lundain oherwydd yr holl aran sydd wedi mynd i bocedi bancwyr Dinas Llundain.

Ac yn bryderus iawn dywed y Toriaid y byddant yn torri arian Cymru yn union yr un modd a Llafur Llundain."


Mae Myfanwy ac arweinydd grwp cynghorwyr y Blaid yn galw ar Lafur Llundain i wrando ar yr holl gyngor annibynnol a rhwystro'r toriadau hyd nes bydd Cymru yn cael chwarae teg.


Dywed y Cynghorydd Peter Hughes Griffiths, Arweinydd Grwp Plaid Group ar y Cyngor Sir:

"Fel cynghorwyr rydym yn cefnogi Myfanwy pob cam o'r fordd. Mae hi'n gwbl annheg fod Llafur San Steffan yn torri cymaint ar arian Cymru.Cofiwch hyn pan fydd etholiad cyffredinnol ar y gweill!"

Ychwanegodd AC Llanelli Helen Mary Jones:

"Llwyddodd Llywodraeth Cymru i liniaru rhywfaint ar y toriadau ciaidd eleni trwy ddefnyddio arian wrth gefn. Ond ni allwn wneud hyn pob blwyddyn. Rhaid i bleidiau Llundain ymrwymo i weithredu yn syth i sicrhau fod cymunedau Cymru yn derbyn yr arian maent ei angen, yr arian mae ganddynt hawl iddo. Yn y cyfamser galwn am atal unrhyw doriadau sydd yn yr arfaethi gyllid Cymru i ganiatau i lywodraeth Cymru fuddsoddi yn ein cymunedau er lles pobl Cymru gyfan."


DIWEDD / ENDS

Nodiadau i olygyddion

Dywed Comisiwn Annibynnol Holtham fod tan-gyllido cynyddol dros y ddegawd nesaf am arwain at golli £8.5bn o gyllid Cymru.

Golyga hyn golli £2,900 y pen.

Felly, gyda phoblogaeth o 78,300 yn Llanelli, gallai hyn olygu colli £227m o ran yr etholaeth - os na fydd gweithredu i newid Fformiwla Barnett sydd bellach wrth gwrs wedi colli ei henw da yn gyfangwbl

Myfanwy yn galw eto at Nia Griffith i amddiffyn y Post

Plaid Cymru Llanelli
Ty Bres,
Heol Bres
Llanelli
SA15 1UH
Gorffennaf 2ail, 2009

Nia Griffith AS
6 Queen Victoria Road
Llanelli
SA15 2TL

Annwyl Ms Griffith,

Amgaeaf lythyr a ddanfonais atoch ar Fehefin yr ail. Nodaf na chefais ateb gan eich swyddfa i’r llythyr hwnnw.

Roeddwn wedi gofyn i chi wrthwynebu cynlluniau i breifateiddio’r Post Brehinol er mwyn gwarchod swyddi ac er mwyn amddiffyn y safonau o wasanaeth yr ydym eu hangen ac yn eu disgwyl. Fel y gwyddoch mae eich cyd-weithiwr yr Arglwydd Mandelson bellach wedi cyfaddef na fydd Llywodraeth y DG yn bwrw ymlaen gyda deddfwriaeth i breifateiddio rhan o’r Post Frenhinol gan na ellir canfod prynwyr ar hyn o bryd.

Mae hefyd yn eglur nad yw hon yn fesur poblogaidd ymhlith eich cyd-aelodau sydd yn fwy plaen yn eu siarad. Mae yn eglur iawn hefyd pe byddai’r mesur yn syrthio, y byddai hynny o gryn embaras i’r Llywodraeth.

Tra ein bod yn croesawi y tro pedol hwn ar ran Llywodraeth San Steffan, nid yw’n ddigon da i roi’r cynlluniau i’r neilltu er mwyn eu hatgyfodi pan y gellir canfon gyrrwr neu pan fo’r chwipiau Llafur yn credu y gallant ennill y ddadl. Ni freuddwydiodd hyd yn oed y Toriaid, y dylid preifateiddio’r Post Brenhinol ac mae’n rhaid eich bod yn gwybod y bydd yna ddi-swyddiadau yn dilyn o’r penderfyniad yna ac ni ellir cyfiawnhau cefnogi mesur sydd yn peryglu mwy o swyddi yn Llanelli.

Rwyf yn eich annog i ymrwymo yn gyhoeddus i bobl Llanelli y byddwch yn pleidleisio yn erbyn y mesur anystyriol ac anghyfrifol hon pan y caiff ei drafod.

Yn ddiffuant,

Myfanwy Davies

Llythyr agored Myfanwy ar Breifateiddio'r Post Brenhinol

Plaid Cymru Llanelli
Ty Bres,
Heol Bres
Llanelli
SA15 1UH

Mehefin 2ail, 2009

Nia Griffith AS
6 Queen Victoria Road
Llanelli
SA15 2TL

Annwyl Ms Griffith,

Yr wyf wedi clywed bod y Llywodraeth yn bwriadu datgan preifateiddio rhan o’r Post Brenhinol yn ystod y dyddiau nesaf. Ynghyd a gweithwyr post a llawer o bobl yn Llanelli rwyf yn teimlo’n ddig iawn ynghlŷn â’r cam ffol a di-hid hwn. Ni fyddai unrhyw lywodraeth call yn ystyried gwerthu’r adnodd hollbwysig hwn, yn arbennig ei werthu yn ystod y dirwasgiad dyfnaf yr ydym wedi ei weld yn ystod ein bywydau. Dysgodd blynyddoedd trychinebus y Toriaid i ni bod diswyddo milain yn dilyn preifateiddio. Ni allwn fforddio i golli mwy o swyddi yn Llanelli - lleiaf oll drwy gamau bwriadol gan Lywodraeth Lafur y DG.

Y mae’r adroddiad Hooper a gomisiynwyd gan eich Lywodraeth Lafur yn dadlau y dylid preifateiddio’r Post Brenhinol er mwyn rhyddhau cyllid i’w galluogi i fodernieddio. Hona’r adroddiad nad yw ein Post Brenhinol mor effeithlon â gweithredwyr post eraill yn Ewrop. Fodd bynnag, mae’r dystiolaeth y mae’n cynnig i gefnogi’r honiad yn gamarweiniol ac amhendant. Er enghraifft, y mae’n cymysgu rhwng prisio ac effeithlonrwydd gweithredol. Y mae’n methu ystyried gwahaniaethau rhwng marchnadoedd cartref gwledydd gwahanol. Y mae’n anwybyddu yr effeithiau negyddol ar ein Post Brenhinol sy’n dilyn o fod yn weithredydd sefydledig. Gwaethaf oll, nid yw’r adroddiad yn archwilo i ffyrdd eraill y gallai’r Post Brenhinol foderneiddio ac nid yw hyd yn oed yn awgrymu faint o gyllid y byddai ei angen i gefnogi’r broses honno. Y mae llawer o bobl yn amau bod yr broses gyfan wedi ei gogwyddo er mwyn rhoi esgus i werthu’r adnodd cenedlaethol hwn i gystadleuwyr ar y cyfandir fel DHL neu INT.

Byddai preifateiddio’r Post Brenhinol ar sail yr adroddiad gwallus hwn yn ddim llai na fandaliaeth. Byddai’r canlyniadau yn dilyn yn gyntaf i weithwyr teyrngar y Post Brenhinol ond yn fuan iawn rwy’n ofni y byddwn ni i gyd yn dioddef dirywiad mewn gwasanaeth a naid mewn prisiau. Dyma wers preifateiddio o dan y Toriaid.

Rwyf yn eich annog yn y termau cryfaf posib i bleidleisio yn erbyn y mesurau hyn pan y’u trafodir. Mae pobl yn Llanelli am i’r Post Brenhinol aros mewn dwylo cyhoeddus ac y mae’n iawn eu bod yn hawlio cefnogaeth eu AS i helpu ei amddiffyn.

Yr eiddoch yn ddiffuant,





Dr. Myfanwy Davies
Ymgeisydd Seneddol Plaid Cymru, Llanelli.