Myfanwy yn ennill cefnogaeth genedlaethol i fusnesau canol y dre

Mae Dr Myfanwy Davies, Ymgeisydd Seneddol y Blaid,Llanelli wedi ennill cefnogaeth genedlaethol i gynllun i helpu busnesau yng nghanol dref Llanelli. Mewn cynnig yng Nghynhadledd Genedlaethol y Blaid y penwythnos diwethaf, a dderbyniwyd gan neuadd orlawn, galwodd am adolygiad o’r cynllun graddfa cymhorthdal i helpu busnesau bach a effeithiwyd gan ddatblygiadau tu allan i’r dref. Hefyd galwodd ar Lywodraeth y Cynulliad i ddatblygu menter cyllid cymunedol i gynnig credyd i fusnesau lleol ac am strategaeth genedlaethol i lanw siopau gwag, hyrwyddo cynnyrch lleol a darparu tai addas mewn canolfannau trefol.

Yn ei haraith yn y gynhadledd dywedodd Myfanwy:

“Mae methiant Cyngor Sir Caerfyrddin I atal datblygiad enfawr tu allan i’r dref ynghyd a cholled o gannoedd o swyddi cynhyrchu yn gwaedu canol ein tref yn sych ”.

Wrth siarad yn Llanelli ddydd Mercher ychwanegodd Myfanwy:

“Mae trethi busnes erbyn hyn yn faich ar ein marchnatwyr yng nghanol y dref . Rydw i’n hynod o falch ein bod wedi ennill cefnogaeth genedlaethol i edrych ar flaenoriaethu eu hanghenion. Hefyd fe enillon gefnogaeth i alw am strategaeth i lanw siopau gwag yng nghanol y dref ac fe fydd Aelodau Cynulliad y Blaid yn awr yn medru brwydro am gynlluniau cyllid cymunedol i ariannu busnesau newydd dichonadwy ac i gefnogi marchnatwyr sydd yno’n barod sydd angen credyd er mwyn iddynt dyfu . Rydw i’n ymwybodol o nifer o fusnesau sefydledig sy’n cael trafferth i dyfu gan i’r union fanciau sydd wedi’u hachub gan arian cyhoeddus,wrthod credyd iddynt” .

Ychwanegodd Helen Mary Jones AC Llanelli Plaid :

“Mae’r penderfyniad yma yn rhoi llwyfan clir i ni frwydro am fwy o gefnogaeth gan y Cynulliad i fusnesau bychain yn Llanelli ac i edrych ar sut yn union y gallwn helpu busnesau da lleol i symud ymlaen a thyfu ”.

Myfanwy i gynnal cynhadledd Sir Gâr ar adeiladu economi gynaliadwy

Bydd Dr Myfanwy Davies, ymgeisydd y Blaid yn Llanelli ar gyfer San Steffan a Nerys Evans, AC rhanbarthol y Blaid, yn cynnal cynhadledd genedlaethol bwysig ar achub swyddi a pharatoi ar gyfer economi werdd. Bydd y digwyddiad, sydd i’w gynnal yn y Gerddi Botaneg ger Llandeilo, yn ymchwilio sut i amddiffyn swyddi a busnesau lleol rhag effeithiau’r dirwasgiad wrth adeiladu economi sy’n gynaliadwy a lle gwneir penderfyniadau gan bobl leol.

Bydd y gynhadledd ‘Gwanwyn Gwyrdd’ yn canolbwyntio’n arbennig ar ddatblygu dulliau cynaliadwy o gynhyrchu bwyd ac ynni a gwella seilwaith fel ffyrdd, rheilffyrdd a thelegyfathrebu. Disgwylir i oddeutu 150 o bobl fynychu, gan gynnwys arbenigwyr a chynrychiolwyr y sector amgylcheddol, diwydiant a’r undebau ffermio. Gyda ffigurau diweddar yn dangos gwahaniaethau trawiadol yn effeithiau’r dirwasgiad ledled y DU, bydd y gynhadledd yn ymchwilio i’r rhesymau pam bod y dirwasgiad wedi taro Cymru – a Gorllewin Cymru’n arbennig – yn galetach na rhannau eraill o’r DU.

Yn siarad o swyddfa’i hymgyrch yn Llanelli, meddai Myfanwy:
“Mae cysylltiad agos rhwng yr argyfwng economaidd a’r argyfwng amgylcheddol. Roedd cynnydd Brown dros y blynyddoedd diwethaf yn seileidg ar brynu nad oedd unrhyw un yn gallu’i fforddio. Ond unwaith eto, ein cymunedau yn Llanelli a Chaerfyrddin sy’n dioddef wrth i Brown amddiffyn y bancwyr.

“Bydd y gynhadledd hon yn edrych yn drylwyr ar y polisïau sydd wedi arwain at y sefyllfa hon – o ran trafnidiaeth, addysg a’r ffordd rydym yn defnyddio’n hadnoddau naturiol – a sut gellir defnyddio’r pwerau sydd gennym yn y Cynulliad, San Steffan, Ewrop a’n cynghorau i greu economi gryfach a gwyrddach.

“Byddwn yn sicrhau bod Cymru’n llwyddo, ond bydd yr economi’n wahanol yn sgil y dirwasgiad hwn. Economi fydd hon i weithio’n lleol a rhoi pobl o flaen elw. Gallwn gynnig newid a diben y gynhadledd yw gweld sut gallwn weithio gydag arbenigwyr, amgylcheddwyr a diwydiant i sicrhau’r newid hwnnw.”

Ychwanegodd Nerys Evans AC:
“Rwyf wastad wedi credu mewn datblygu economi gynaliadwy yng Nghymru. Mae’r ffaith y bydd cynifer o’n prif wleidyddion yn cwrdd ag arbenigwyr o’r maes am y dydd i ddatblygu ffordd integredig o fyw’n gynaliadwy yn dangos faint rydym o ddifrif am yr argyfwng economaidd ac amgylcheddol. Byddwn yn sicrhau bod Cymru’n goroesi’r argyfwng, ond dyma’r amser i sicrhau ein bod ar flaen y gad o ran byw a gweithio’n gynaliadwy.”

Datganiad ar yr economi

Diolch i Lafur Newydd yn rhoi pen rhyddid i’r bancwyr, mae’r dirwasgiad yn debygol o bara am flwyddyn o leiaf. Mae nifer y tai sy’n cael eu hadfeddiannu wedi dyblu ers yr haf. Mae cannoedd o swyddi dan fygythiad yn Llanelli. Mae Helen Mary Jones AC Plaid Cymru Llanelli yn gweithio’n galed i gadw swyddi gweithgynhyrchu yn Llanelli, ac mae Ieuan Wyn Jones yn sicrhau bod Llywodraeth y Cynulliad yn gwneud popeth yn ei gallu. Ond mae’r dyfodol yn ansicr i lawer ohonom.

Mae Myfanwy yn galw am fwy o gamau i helpu Llanelli drwy’r cyfnod anodd hwn.
Canol Trefi Llanelli a Phort Tywyn: Mae modd gadael siopau’n wag pan fydd tenantiaid yn wynebu problemau cyfreithiol o ran gadael eu prydles. Rhaid i’r Cyngor Sir weithredu i gael cleientiaid newydd mewn siopau gwag yn Llanelli a Phort Tywyn.

Bydd Myfanwy yn cefnogi cais realistig i gael arian i Upper Park Street a bydd yn ymgyrchu am newidiadau i’r Cynllun Datblygu Lleol i adlewyrchu anghenion pobl ym Mhorth Tywyn.

Busnesau: Mae Ieuan Wyn Jones wedi cyflwyno’r cynllun ‘ReAct’ i roi arian i fusnesau sy’n cyflogi pobl sydd newydd golli’u swydd.

Mae modd helpu cwmnïau gydag archebion ar eu llyfrau ar gyfer y dyfodol, ond sydd heb waith nawr, i gadw gweithwyr drwy’r cynllun ‘ProAct’. Mae Myfanwy wedi galw ar Mr Jones i sicrhau bod holl gwmnïau Llanelli yn gwybod sut i wneud cais.
Ynghyd ag Adam Price AS a Jill Evans ASE, mae Myfanwy yn ymgyrchu i newid cyfraith gystadleuaeth yr UE fel bod Llywodraeth y Cynulliad yn gallu rhoi benthyciadau i fusnesau Cymru islaw cyfradd y farchnad.

Tai Fforddiadwy: Mae Myfanwy yn galw ar y Cyngor i sicrhau bod pobl yn Llanelli yn gallu cael help drwy gynllun achub morgeisi Jocelyn Davies, Gweinidog y Blaid, a gwneud y defnydd gorau o bron £1 miliwn y mae Jocelyn Davies wedi’i ddarparu ar gyfer mwy o dai fforddiadwy yn Sir Gâr.

Help i Deuluoedd: Gyda Helen Mary, mae Myfanwy wedi galw ar Lywodraeth y DU i ariannu gofal plant fforddiadwy i bob rhiant.
Mae Myfanwy wedi ymuno ag ASau’r Blaid i alw am derfyn ar brisiau ynni a chyfraddau rhatach i’r rheini sy’n ei chael yn anodd talu, yn enwedig teuluoedd ifanc a phensiynwyr.

Yn siarad o’i swyddfa ymgyrchu yn Llanelli, meddai: “Mae’r Blaid yn y Cynulliad yn cymryd camau ymarferol i helpu pobl gyffredin a busnesau. Mae’n bryd i’r Blaid Lafur yn Llundain fuddsoddi lle mae’r angen yn hytrach na thaflu arian at y banciau. Mae angen gweithredu nawr i ddiogelu swyddi go iawn a pharatoi ar gyfer y dyfodol. Ac mae angen cyfreithiau newydd i sicrhau nad oes modd i fancwyr barus wneud y fath beth i’n cymunedau eto.”