Plaid : Angen codi pris alcohol i achub ein tafarnau traddodiadol

Y mae Helen Mary Jones, AC Plaid Cymru Llanelli a Myfanwy Davies, ymgeisydd seneddol Plaid Cymru yn Llanelli, wedi datgan y dylai pris alcohol gael ei leihau er mwyn achub ein tafarndai lleol traddodiadol.

Mae Myfanwy a Helen Mary am weld cyflwyno prisiau llai ar alcohol i helpu tafarndai traddodiadol yn eu brwydr yn erbyn prisiau rhad yn yr archfarchnadoedd. .Yn ogystal â chynorthwyo’r tafarndai dan fygythiad maent yn credu y byddai codi pris alcohol rhad yn atal pobl ifanc rhag yfed yn wirion a hefyd yn lleihau lefelau tor- cyfraith.

Mae nifer o landlordiaid lleol wedi lleisio’u pryder gyda Helen Mary a Myfanwy, ac wedi sôn am y trafferthion maent yn eu hwynebu wrth geisio ymladd i gystadlu gyda phrisiau isel alcohol mewn archfarchnadoedd.

Croesawodd Helen Mary a Myfanwy'r argymhellion mewn adroddiad diweddar gan Bwyllgor Iechyd Tŷ’r Cyffredin i gyflwyno isafswm pris ar alcohol. Gwnaeth argymhellion eraill gynnwys gwaharddiad ar hysbysebion sy’n weledol i blant a gwaharddiad ar hysbysebu alcohol ar wefannau rhwydweithio cymdeithasol .

Bydd Helen Mary a Myfanwy yn dosbarthu holiadur yn yr wythnosau nesaf i ‘r holl dafarndai yn etholaeth Llanelli yn gofyn iddynt a hoffent weld cyflwyniad o isafswm o bris ar alcohol.

Dywedodd Helen Mary Jones:

"Mae tystiolaeth gref iawn oddi wrth y BMA, ymhlith eraill , fod cyflwyno isafswm pris ar alcohol yn gallu gwneud gwahaniaeth mawr yn y frwydr yn erbyn y diwylliant gor-yfed gwirion.

Mae’r prisiau cyfredol isel mewn archfarchnadoedd yn wael iawn i’n tafarndai cymunedol, sy’n methu a chystadlu ar brisiau. Mae landlordiaid yn darganfod fod eu cwsmeriaid wedi yfed llawer cyn ,hyd yn oed, cyrraedd y dafarn , ac o bosib byddai landlordiaid cyfrifol yn teimlo na ddylent werthu mwy o alcohol iddynt.

Fe fyddwn yn gwneud arolwg o holl dafarndai yn ardal Llanelli i ddarganfod beth yw safbwynt y landlordiaid ar gyflwyno isaf -bris ar alcohol a hefyd pa gamau eraill i gefnogi eu busnesau yr hoffent weld y Llywodraeth yng Nghaerdydd neu yn Llundain eu gwneud.

Mae gan y dafarn leol rhan bwysig i chwarae yn y gymuned ac mae llawer gormod ohonynt wedi’u colli yn y blynyddoedd diwethaf. Hoffwn weld beth yn union fedrwn wneud i gefnogi'r tafarndai cymunedol sydd yn weddill yn ardal Llanelli, ac i sicrhau bod ganddynt ddyfodol llewyrchus”.

Ychwanegodd Myfanwy :

" Rydym yn gweld lefelau pryderus o uchel o alcoholiaeth yn Llanelli wrth i bobl yfed mwy ar eu pennau ei hunain yn eu cartrefi .Mae pobl hefyd yn prynu diodydd llawer cryfach nag oeddynt yn y gorffennol. Mae mor hawdd i brynu fodca rhad iawn ,a gwirodydd eraill, yn ein harchfarchnadoedd ac mae’r pris isel yn annog pobl i yfed llawer mwy, wrth iddynt yfed yn eu cartrefi cyn mynd allan am noson yn y dre.

Mae gan dafarndai cymunedol rôl bwysig i chwarae drwy helpu pobl i yfed yn gyfrifol. Maent yn cynnig mwy nag yfed yn unig, gan eu bod yn llefydd i gyfarfod yn gymdeithasol ac yn llefydd i bobl hŷn gael cwmnïaeth a chefnogaeth cymdeithasol.

Rydym yn gwybod fod ein tafarndai cymunedol yn wynebu amser anodd iawn ac rydym am gynnig iddynt help ymarferol.”

Myfanwy yn gofyn i’r Gweinidog Iechyd am driniaeth arbenigol i blant sydd wedi’u hanafu yn Gaza

Mae Dr. Myfanwy Davies, ymgeisydd Seneddol y Blaid ar gyfer Llanelli, wedi ysgrifennu at Mrs Edwina Hart, Gweinidog y Cynulliad dros Iechyd, yn cefnogi galwadau i blant sydd wedi’u hanafu’n ddifrifol yn Gaza ddod i Gymru i gael triniaeth arbenigol.

Mae pwysau aruthrol wedi bod ar y cyfleusterau iechyd yn Gaza dros y flwyddyn ddiwethaf yn sgil y gwarchae. Yn ystod y mis diwethaf, maent wedi cael eu targedu’n uniongyrchol, sy’n rhoi cyfyngiadau pellach ar y gofal y gallant ei gynnig i blant sydd wedi’u hanafu.

Wrth ysgrifennu at y Gweinidog, tynnodd Dr Davies sylw at gynnig yr UE i’r aelod-wladwriaethau gydlynu i gludo plant o Gaza am resymau meddygol. Nododd Dr. Davies hefyd fod gwledydd eraill, gan gynnwys Cyprus, Lwcsembwrg a Gwlad Groeg eisoes wedi cynnig cymorth.

Yn siarad ddydd Sul, meddai Dr. Davies:

“Mae gennym draddodiad gwych yng Nghymru o gynnig help i bobl o wledydd eraill sy’n wynebu amgylchiadau anodd dros ben. Rydym yn gwybod nad yw’r gwasanaethau iechyd yn Gaza yn gallu ymdopi, felly rwy’n gofyn i’r Gweinidog sicrhau bod lleoedd ar gael mewn unedau arbenigol fel yr uned losgiadau yn Nhreforys i’r plant sydd wedi dioddef yr anafiadau gwaethaf yn sgil yr ymosodiadau awyr diweddar.”